لا تربية ولا تعليم - ثانوية عامة

والله لا تربية ولا تعليم

الثانوية العامة...

طبعا أول لما سمعت الاسم حسيت بضيق في النفس ورعشة في جسمك، وبسرعة بدأت ذكرايات زبالة تدور في ذهنك.

صح !! أكيد صح ومش لوحدك دي مشكلة أكتر من 200 ألف بني آدم كل سنة، بيعانوا وبيتعذبوا ن أقرب الناس ليهم قبل ما يتعذبوا من الناس البعيدة عنهم.

أبوك وأمك وقرايبك عاوزينك تدخل (كلية قمة) عشان (كليات القاع) ملهاش مستقبل، طريقة تفكير عقيمة من جيل متكبر وأناني كان عايش حياته براحته وخاربها في سنه وجاي دلوقتي يقول علينا شباب فاسد وصايع!

خلينا نسيب موضوع صراع الأجيال دا بعدين ونتكلم المهم النهارده في موضوع الثانوية، طبعا زي ما قولنا إنهم ضاغطين عليك ضغط جبار عشان تدخل كلية قمة زي ما بيقولوا ومش حاسين بتعبك ولا بعذابك النفسي ولا بخوفك، هم كل اللي هاممهم إنك تشرفهم وترفع راسهم وتشرف اسمهم، إزاي بقي !! ملهمش دعوة بإزاي..

بص الثانوية مش وحش مرعب مستنيك في آخر الطريق عشان يقتلك، لا، الثانوية سنة عادية زيها زي أي سنة ومش بتحدد مستواك، إنت اللي في إيدك تكون الشخص المحترم اللي طول عمرك بتحلم تكونه، الثانوية عمرها ما كانت مقياس لإبداعك وتنميزك، أوائل الثانوية ليسوا إلا ماكينات للحفظ، مستواهم الاجتماعي متدني ومعظمهم عندهم عقم في التعامل مع الآخرين وأغلبيتهم مش بيأمنوا للناس وحاسين إن كل الناس ضدهم..

الثانوية العامة لو سلمتلها هتقل إبداعك وهتموت حلمك وتقتل ثقتك بنفسك، إبعد عن أهلك وعن طلباتهم، وخليك الشخص الطبيعي الهادي، خليك علي طبيعتك، إنت بإيدك تكون الشخص المحترم من أي كلية أو معهد، بتاع الطب مش بيقدر يستغني عن المحاسب أو المهندس أو المحامي أو المدرس...

كل الكليات زي بعضها ومفيش كليات صعبة وكليات سهلة، صدقني واسمع مني..

لو عجبك الموضوع شاركة علي الفيس بوك (انسخ الرابط وشارك)

ول عندك تعليق سيبه في كومنت وهرد عليك